Condenado a 15 anos o exlíder do DUP norirlandés por abusar de dúas nenas

O exlíder do probritánico Partido Democrático Unionista (DUP) de Irlanda do Norte Jeffrey Donaldson foi condenado este xoves a quince anos de cárcere polas agresións sexuais cometidas contra dous menores entre 1985 e 2008.

O expolítico protestante, de 63 anos, foi declarado culpable o pasado xuño de 18 delitos sexuais contra dúas mulleres cando eran nenas, entre eles un de violación, 13 de agresión sexual e catro de indecencia grave.

Durante a lectura hoxe da sentenza, o xuíz Paul Ramsey lembrou que Donaldson negou "firmemente" a súa culpabilidade durante todo o proceso e que manifestou a súa intención de recorrer as condenas.

O maxistrado expuxo que o exlíder do DUP non asumiu nunca a responsabilidade polos seus delitos e que carece de empatía cara ás súas vítimas.

Antes de impoñer a sentenza, Ramsey pediu a Donaldson que se puxese de pé e díxolle que a condena representa "descenso catastrófico cara á deshonra".

O maxistrado impúxolle once anos de prisión polos delitos cometidos contra a vítima B e outros catro anos polos perpetrados contra a vítima A, unhas penas que deberá cumprir de forma consecutiva, polo que pasará un total de 15 anos no cárcere.

Donaldson chegou ao liderado do DUP en xuño 2021 e abandonouno en marzo de 2024 despois de ser acusado.

A súa esposa, Eleanor Donaldson, estaba acusada de complicidade nos delitos, pero por motivos de saúde mental non podía ser sometida a xuízo, polo que, a cambio, enfrontouse a un proceso xudicial baseado nos feitos, o que significa que se lle pediu ao xurado que determinase se ela cometeu ou non os actos dos que lla acusaba.

Así, o xurado ditaminou que ela si fora cómplice.

As denunciantes, só coñecidas coas letras A e B, prestaron declaración no xuízo que empezou o pasado maio e alegaron que foron vítimas de abusos sexuais na súa infancia.

Donaldson chegou a ser o deputado máis veterano da provincia na Cámara dos Comúns, onde accedeu en 1997 inicialmente co Partido Unionista do Ulster (UUP), do que saltou despois ao DUP polo seu rexeitamento ao acordo de paz do Venres Santo (1998), o texto que puxo fin ao conflito en Irlanda do Norte.

Nacido en decembro de 1962, o maior de cinco nenos e tres nenas, Donaldson criouse na zona rural de Kilkeel, condado de Down, en Irlanda do Norte. En 2021 concedéuselle o título honorífico de cabaleiro -'Sir'- polo seu servizo á política.