Piden ata 32 anos de prisión para catro homes por drogar e violar dúas mulleres en Santiago
Os catro acusados declararon na última xornada do xuízo para asegurar que as relacións foron consentidas
Os feitos denunciados sucederon hai case sete anos nun edificio do ensanche de Santiago, despois de catro saídas nocturnas entre os meses de maio e xuño. O informe fiscal conclúe que os homes drogaron as mozas para dobregar a súa vontade. Despois, violáronas. Unha das vítimas foi agredida polos catro e mesmo a gravaron en vídeo sen o seu consentimento.
O Fiscal pide para eles penas de 14 a 32 anos de prisión. Na súa declaración, diante do xuíz, os catro procesados mantiveron que as relacións sexuais coas 2 vítimas foran sempre consentidas e que as mulleres consumiran de xeito voluntario cocaína. Debido á situación de vulnerabilidade das vítimas, a letrada que as defende non fixo declaracións á prensa.
As dúas mozas , que declararon como testemuñas protexidas, residían temporalmente nunha vivenda de acollida do programa Vagalume de apoio a mulleres en contextos de prostitución e trata con fins de explotación sexual. Neste momento manteñen unhas circunstancias de vida normalizada.
