Condenado a 22 anos de prisión por dous delitos de agresión sexual a unha menor na Coruña
O home acudiu de madrugada ao portal do domicilio da muller e, a pesar de a súa negativa, exerceu violencia e realizou diversos actos de carácter sexual contra ela sen o seu consentimento
A Audiencia tamén entende probado que o investigado "era plenamente consciente de que a moza era menor de dezaseis anos"
A sección primeira da Audiencia Provincial da Coruña condenou un home a 22 anos de prisión por dous delitos de agresión sexual sobre unha menor. Ademais, segundo a sentenza do 23 de setembro que publicou este venres o Tribunal Superior de Xustiza de Galicia (TSXG), deberá indemnizala con 30.835 euros polos danos morais ocasionados.
Ambos mantiñan, desde o verán de 2024, "encontros sexuais", pero foi en novembro dese ano cando o home acudiu de madrugada ao portal do domicilio da muller e, a pesar da súa negativa, exerceu violencia e realizou diversos actos de carácter sexual contra ela sen o seu consentimento. Tamén a agrediu fisicamente cando intentou apartarse.
Como consecuencia destes feitos, a menor sufriu posteriormente diversos problemas emocionais e psicolóxicos.
O tribunal explica que existe "un abafador e consistente material probatorio". Baséase principalmente na declaración da vítima, que considera "crible"e corroborada por outras probas, entre elas mensaxes e audios intercambiados entre ambos.
A Audiencia tamén entende probado que o investigado "era plenamente consciente de que a moza era menor de dezaseis anos". A resolución non é firme, xa que cabe recurso ante o TSXG.
.png)
