O Supremo non admite a demanda de Julio Iglesias contra Yolanda Díaz

O Tribunal Supremo acordou a inadmisión a trámite da demanda por protección ao honor que presentou o cantante Julio Iglesias contra a ministra de Traballo e vicepresidenta segunda do Goberno, Yolanda Díaz, por falta de competencia.

A Sala do Civil do Tribunal Supremo sinala que entra dentro do seu ámbito competencial as demandas de responsabilidade civil dos membros do Goberno "por feitos realizados no exercicio do seu cargo", pero considera que non se dá neste caso.

O Supremo lembra que Iglesias considerou vulnerado o seu honor polas manifestacións vertidas pola ministra na rede social Bluesky e nun programa de televisión despois de coñecerse que unhas extraballadoras do cantante o acusaban de presuntas agresións sexuais.

Neste caso, a Sala conclúe que "as opinións ou manifestacións controvertidas non gardan a necesaria conexión co exercicio dos cargos que motivan o aforamento nin supoñen unha translación á opinión pública das políticas propias do Ministerio de Traballo". Por iso, expón que a competencia corresponde ás seccións civís dos tribunais de instancia.

"Trátase de declaracións que, se ben proceden dunha persoa aforada, non están protexidas polas prerrogativas establecidas, xa que na mensaxe de Bluesky actuou como cidadá e dirixente política e, no contexto global da entrevista, na parte controvertida manifestouse esencialmente como política feminista e dirixente de Sumar, pero non como ministra de Traballo ou vicepresidenta segunda do Goberno.

E engade que a condición de ministra quedou limitada á resposta dada a determinadas preguntas que efectivamente gardaban relación directa coa súa carteira (o salario mínimo, as pensións ou a xubilación) e que nada teñen que ver cos feitos que motivaron a demanda".

Na súa demanda do pasado xullo, Julio Iglesias reclamáballe a Díaz unha indemnización de 50.000 euros por presunta intromisión no seu honor.

Tempo antes, o cantante instara a vicepresidenta do Goberno, a través do seu avogado José Antonio Choclán e nunha petición de conciliación, a rectificar en público unha mensaxe que subiu ás redes sociais.