Deteñen un home sospeitoso do asalto a 14 vivendas na Terra Chá

A Garda Civil, no marco da operación Moucho, detivo un veciño de Vilalba como suposto autor dun delito continuado de roubo con forza no interior de vivendas e esclareceu ata o momento catorce asaltos cometidos entre setembro do pasado ano e abril do actual en distintos municipios da comarca de Terra Chá.

A investigación foi desenvolvida por axentes da Garda Civil de Vilalba, despois de detectar un notable incremento dos roubos no interior de vivendas unifamiliares, normalmente situadas en núcleos rurais dispersos dos municipios de Vilalba, Abadín, Castro de Rei e outras zonas limítrofes.

Segundo informou este mércores a Comandancia de Lugo, o detido seleccionaba vivendas illadas e aproveitaba a ausencia dos seus moradores e a escasa presenza de persoas na zona para actuar.

Tras vixiar os inmobles, accedía ao seu interior forzando fiestras ou portas, principalmente pola parte traseira ou a planta baixa das vivendas. Levábase normalmente xoias, cobre, electrodomésticos, vaixelas e outros aveños domésticos.

As xoias eran vendidas de forma habitual en establecementos de compravenda de ouro en Lugo, os obxectos domésticos eran comercializados no mercado de segunda man da capital lucense e os metais eran entregados en chatarreiras da localidade de Vilalba.

Este martes, a Garda Civil practicou un rexistro no domicilio do detido, onde recuperou numerosos obxectos obtidos supostamente neses roubos, cuxo valor supera os 30.000 euros.

A Garda Civil continua coas xestións para localizar aos seus lexítimos propietarios e determinar a posible relación do detido con outros feitos delituosos.

O detido foi posto ao dispor xudicial. A operación permanece aberta e non se descartan novas actuacións policiais.