Os británicos de 16 e 17 anos terán toque de queda nocturno nas redes sociais

Os mozos de 16 e 17 anos no Reino Unido terán activado por defecto un toque de queda nocturno para redes sociais así como deshabilitadas as súas funcións máis aditivas, como a reprodución automática de vídeos, segundo un plan presentado este mércores polo Goberno británico.

A iniciativa, parte dunha proposta máis ampla xa anunciada que incluirá a prohibición de acceder a redes a menores de 16 anos, pretende ofrecer unha maior protección aos adolescentes na transición ata a maioría de idade, indicou o Ministerio de Tecnoloxía nun comunicado.

No entanto, os críticos sinalaron que o plan pode ter un efecto menor do esperado, dado que a función de toque de queda, que se aplicará entre medianoite e as 6 da mañá para plataformas como TikTok, Youtube ou Instagram, poderá ser desactivada polo usuario.

O Ministerio estuda ademais medidas para reforzar a protección dos menores nos servizos de intelixencia artificial, con posibles restricións de acceso a certos chatbots considerados potencialmente nocivos, como algúns que ofrecen "consellos perigosos, enganosos ou non verificados sobre saúde mental".

O Goberno prevé tramitar ante o Parlamento o primeiro paquete de regulacións despois do verán, con vistas a que as medidas, incluída a prohibición de acceso a redes aos menores de 16 anos, entren en vigor a mediados de 2027.