Deteñen un home por provocar varios incendios en Londres, un na casa de Starmer

Un home foi arrestado este martes como sospeitoso de provocar incendios en varias propiedades en Londres, un deles na casa particular do primeiro ministro británico, Keir Starmer, informou a Policía Metropolitana da capital británica (Met, en inglés).

O sospeitoso, un mozo de 21 anos cuxa identidade non foi revelada, foi detido esta madrugada e permanece nunha comisaría desta capital para ser interrogado polos axentes.

Este luns declarouse un pequeno incendio na entrada da casa que ten Starmer no barrio de Kentish Town, no norte desta capital, aínda que o xefe do Goberno vive na residencia oficial de Downing Street e, segundo os medios, a súa vivenda de Londres está alugada.

Ata o momento non se relaciona o incidente cun acto terrorista, aínda que a unidade antiterrorista da Met está a investigalo dado que a propiedade é do primeiro ministro.

Ademais, outros dous incendios provocados son investigados pola policía.

Segundo o comunicado divulgado este martes pola Met, os axentes acudiron onte á vivenda de Kentish Town, que sufriu danos pero ningunha persoa resultou ferida.

"Como medida de precaución, e debido a que a propiedade tiña vínculos previos cunha figura pública de alto perfil, axentes do Comando Antiterrorista da Policía Metropolitana están a liderar a investigación deste incendio. As investigacións continúan para determinar a causa", precisa a nota.

"O equipo de investigación tamén está a considerar outros dous incidentes: un incendio dun vehículo en NW5 (área do norte de Londres) o xoves 8 de maio e un incendio na entrada dunha propiedade en N7 (tamén ao norte de Londres) o domingo 11 de maio, e investiga se poderían estar relacionados co incendio en NW5 (onde está a casa de Starmer) do 12 de maio", agrega.

Os tres incendios considéranse sospeitosos e as investigacións continúan, conclúe o comunicado.