Deteñen un home en relación co alixo comisado en setembro na Pobra de 3,6 toneladas de cocaína

Axentes da Policía Nacional detiveron un home pola súa suposta vinculación co alixo de 3.650 quilos de cocaína que foi incautado en setembro no municipio coruñés da Pobra do Caramiñal.

Segundo fontes do operativo consultadas por Europa Press, a detención, realizada no marco da operación Saona, produciuse este mércores na mesma localidade da cara norte da ría de Arousa e súmase ás xa practicadas en setembro.

Desta forma, está previsto que o home, segundo fontes xudiciais, pase a disposición xudicial na xornada do xoves no Tribunal de Instancia de Muros.

A operación 'Saona', levada a cabo por axentes da Unidade de Droga e Crime Organizado (UDYCO), en colaboración coa DEA nortamericana, deixa ata o de agora 14 detidos.

Ademais, levaron a cabo 18 rexistros na provincia da Coruña e no municipio pontevedrés de Cambados, entre eles, nun taller de embarcacións situado en Aldea Tragove, vinculado cunha empresa de alugueiros náuticos en Sanxenxo.

As primeiras detencións producíronse o sábado 14 de setembro cando se arrestou a tres homes, un de nacionalidade colombiana e dous ecuatorianos, tras o achado da droga, que chegou ás costas galegas, posiblemente, nun narcosubmarino.

Foron axentes do Grupo de Resposta Especial para o Crime Organizado (Greco) Galicia os que interceptaron a substancia estupefaciente despois de que caera do vehículo que a transportaba por mor dun operativo policial. Foron nese momento ao redor de 1.000 os quilos localizados.

O achado do segundo alixo produciuse tras a información proporcionada pola Policía Nacional. Axentes municipais realizaron unha inspección perimetral polas zonas en que podería atoparse e, finalmente, atopárona.