Desmantelan unha organización que distribuía cocaína na comarca de Sarria

A Garda Civil, no marco da operación Rubber duck (parrulo de goma), desarticulou unha organización criminal dedicada á distribución de cocaína, con actividade en distintas localidades de Galicia e León.

A operación deixa seis persoas detidas, de las cales os dous principais integrantes da organización ingresaron en prisión.

A investigación iniciouse no verán de 2025, logo de detectarse un incremento da venda de substancias estupefacientes en Sarria e áreas limítrofes.

As primeiras pescudas permitiron detectar que varias persoas realizaban frecuentes desprazamentos desde Madrid ata localidades como Ponferrada, Sarria e Lugo, presuntamente para abastecer de droga a distribuidores locais.

En setembro do pasado ano practicáronse las primeiras intervencións en Madrid, onde detiveron dous veciños de Lugo, de 68 e 51 anos, a quen se lles incautou un quilogramo de cocaína.

As investigacións permitiron comprobar que a organización utilizaba vehículos modificados con compartimentos ocultos, coñecidos como 'caletas', de difícil detección, que empregaban para transportar tanto substancias estupefacientes como armas de fogo.

A finais do 2025, nun aparcamento público de Ponferrada, procedeuse á detención doutros dous integrantes da organización, un veciño da localidade berciana, de 36 anos de idade, e outro de Madrid, de 34 anos de idade.

Nesta actuación interveuse unha arma curta de 9 mm, sen numeración e lista para ser empregada, ademais de 8.300 euros en efectivo.

Ao detido procedente de Madrid tamén se lle atribuíron presuntos delitos de falsidade en documento público e contra a seguridade viaria, ao portar un permiso de condución falsificado a nome doutra persoa, co que supostamente pretendía ocultar que carecía de autorización para conducir en vigor.

A fase final da operación desenvolveuse en Sarria, onde foron detidos outros dous veciños da localidade, de 44 e 33 anos de idade, considerados presuntos distribuidores finais da droga na zona.

Con estas actuacións, a Garda Civil dá por desarticulada a que considera como unha das redes de distribución de cocaína máis activa da provincia de Lugo.

As dilixencias instruídas foron postas ao dispor do tribunal praza un, sección de instrución de Lugo.