Detectan outros 18 xabarís con peste porcina en Cataluña

Os Servizos Veterinarios Oficiais  de Cataluña notificaron este luns dous novos focos de peste porcina africana en xabaríns silvestres tras o achado de 18 animais mortos infectados co virus.

Os 18 novos casos detectáronse no municipio de Cerdanyola del Vallès, onde apareceron a finais do pasado mes de novembro os primeiros xabarís mortos por mor dun virus que non se rexistraba en España desde 1994.

Con estes novos casos ascenden a trece os focos detectados ata a data, cun total de 47 animais positivos á peste porcina, segundo unha nota de actualización publicada este luns polo Ministerio de Agricultura, Pesca e Alimentación.

O Goberno de Cataluña subliñou que as novas deteccións reflicten casos acumulados durante o último período de días festivos e asegura que non reflicten un incremento repentino. O Ministerio reiterou que seguen os "intensos" labores de busca de cadáveres de xabaríns e de captura para a redución das súas poboacións.

Os servizos veterinarios oficiais manteñen tamén os controis nas granxas e outros establecementos de porcino coa análise das 57 explotacións localizadas na zona infectada, onde non se detectou "sintomatoloxía nin lesións compatibles" co virus da peste porcina africana.

Aínda así, mantense un "alto nivel" de alerta con reforzo de vixilancia pasiva e bioseguridade en granxas de porcino e en poboacións de xabaríns silvestres, tanto en Cataluña como no resto de comunidades españolas.

A peste porcina africana é unha enfermidade non zoonósica, é dicir, as persoas non son susceptibles á infección nin por contacto cos animais nin por inxestión de produtos derivados deles, lembraron desde o Ministerio.