Desvalixan cinco vivendas na rúa do Cruzamento, en Lugo
Os ladróns puideron entrar polo lousado para levar cartos, xoias e outros obxectos de valor
Os veciños de dous edificios da rúa do Cruzamento, en Lugo, levaron unha desagradable sorpresa á volta da ponte do Pilar. Topáronse con que lles entraran a roubar, botando en falta cartos, xoias e outros obxectos de valor, como dispositivos electrónicos.
Ata o momento, hai cinco denuncias por estes feitos, pero podería ser aínda maior o número de afectados. Para accederen ás vivendas, sospéitase que os ladróns puideron entrar pola cuberta de ambos bloques. De feito, os pisos desvalixados son os superiores, e nun terceiro edificio lindeiro ao día seguinte apareceu unha claraboia aberta cunha escada ao lado, que colleran nun rocho.
Segundo a unidade policial de delitos contra o patrimonio, que investiga o caso, as pescudas para identificar os asaltantes van moi avanzadas. Tanto é así, que parte dos denunciantes xa comezaron a recuperar os bens subtraídos.
