Derrota do Celta Fortuna no seu amigable ante o Sporting de Xixón (0-2)

O Celta Fortuna comezou o seu calendario de amigables con derrota tras caer ante o Sporting de Xixón (0-2) no partido disputado na Cidade Deportiva Afouteza. Dous goles de Gaspar Campos e Pablo García no tramo final da primeira metade déronlle a vitoria ao equipo asturiano que está a realizar a pretemporada nas instalacións do cadro vigués.

O adestrador céltico Fredi Álvarez tivo que tirar de moitos xogadores do xuvenil ante as importantes ausencias que tiña. Antañón e Anxo aínda non se incorporaron despois do Europeo sub 19 e ata seis xogadores habituais no filial vigués atópanse en dinámica do primeiro equipo. Pese as baixas a primeira metade resulto igualada ata os últimos minutos onde os asturianos acadaron os dous goles. O primeiro obra do capitán Gaspar Campos cun disparo desde a frontal da área e o segundo do carileiro Pablo García aproveitándose dun rexeite do poste esquerdo da portería que defendía Marcos González. O peor deste período foron as lesións de Adriane Kilbet e Jan Oliveras que se tiveron que retirar mancados do terreo de xogo.

Na segunda metade, e con equipos totalmente diferentes en ambos equipos, mantívose o marcador . O Sporting anotou un terceiro tanto por medio do ex celeste Miguel Conde pero o colexiado anularíao por posición de fóra de xogo. Ao final derrota nun partido de pretemporada que serviu para que o adestrador Fredi Álvarez puidese valorar a moitos xogadores en idade xuvenil que veñen traballando co seu equipo.