Baño de masas do Celta Fortuna en Vigo logo do ascenso ao fútbol profesional
Milleiros de afeccionados recibiron aos heroes do filial na Porta do Sol
A festa prorrogouse despois do fito histórico acadado este sábado diante da Ponferradina
En Vigo seguen de celebración logo do ascenso a segunda división do Celta Fortuna. Trala recepción no Concello a festa desprazouse á Porta do Sol, onde os futbolistas do filial foron recibidos por unha multitude de siareiros.
Todos os xogadores do plantel foron saíndo ao escenario, ovacionados polos afeccionados que non faltaron á chamada do club despois da histórica goleada contra a Ponferradina (4-1), que lles valeu o ascenso ao fútbol profesional por primeira vez na historia.
Os máis ovacionados, os capitáns, o goleador Hugo González, e tamén o auténtico artífice deste éxito, o adestrador Fredi Álvarez.
A presidenta, Marián Mouriño, amosábase entusiasmada. "Estamos orgullosísimos e encantados. Isto pon en valor todo o proxecto de todos, facendo un Celta máis grande. Queremos que Fredi siga", continuou, para rematar cunha afirmación categórica: "Este equipo non ten teito"
