Denuncian que os roubos no campo de fútbol da Grela, na Coruña, son frecuentes

Era a primeira vez que o Numancia de Ares xogaba no campo da Grela, na Coruña, e a súa estrea deixounos con mal sabor de boca.

Mentres se disputaba o partido, alguén, sen forzar a porta do vestiario, roubou todos os billetes que os os 16 xogadores e 2 directivos tiñan nas súas carteiras. Entre 500 e 600 euros.

Decatouse un dos xogadores ao descubrir que a súa carteira non estaba no peto onde a deixara antes de saír a xogar.

Non daban creto. E menos aínda cando co paso das horas souberon que non era a primeira vez que pasaba e que non foran as únicas vítimas da tarde do domingo pasado.

Quéixanse de que ninguén os alertara e tamén da falta de control.

Tras interpoñer a correspondente denuncia, a Policía Nacional abriu unha investigación.