Preocupación entre os hostaleiros de Valdoviño polos roubos en cinco locais
Os ladróns levaron a recadación da caixa e non causaron danos no interior dos locais
Reptando polo chan para evitar ser gravado polas cámaras de seguridade. É a imaxe que nos deixa a fuxida do ladrón que levou do hotel Torre de Lago, en Valdoviño, a recadación da caixa.
"Soou a alarma ás tres da mañá pero non parecía nada. E cando chegamos estaban os cilindros das portas rebentados", explica Manel Sanmartín.
Máis obstáculos tiveron que sortear no caso de Casa Marino.
"Saltaron o muro para acceder á terraza. E desde aí forzaron a porta que da á cociña para entrar no local", indica Fernando Rico.
Sen causar máis danos, levaron a recadación da caixa e os cartos da lotaría dunha peña da zona.
"Só levaron os cartos. Viñan a tiro fixo", di Fernando Rico.
A Garda Civil ten aberta unha investigación para dar cos responsables dos roubos. Foron cinco en total, o que causou preocupación na zona.
