Denuncia un rapto con violación en Carballo: "Quería que fose a súa muller"
A Garda Civil investiga o caso de oficio porque a muller non denunciou "por medo"
Retivérona nunha casa durante catro días, con agresións sexuais e vexacións que lle custa verbalizar
Obsesionouse con ela, propúxolle unha relación, pero ante o seu non...
"Lanzouse un mozo cara a min e meteume á forza nun coche", relata a vítima.
Levárona ata unha casa, onde entrou á forza e alí dentro empezou un pesadelo que nunca puido imaxinar.
"Empúrrame, ponse a consumir drogas, cada vez se pon máis violento, ata agarrarme á forza e abusar de min. Violoume e penetroume", engade.
Relata episodios de violencia extrema, que mesmo custa escoitar. Despois, chegou un perdón que non era tal, así que o segundo día de encerro cambiou de estratexia.
"Decidín ser máis mansa. Pedinlle que me deixase marchar e que eu volvería, que quería estar con el".
Serviu polo menos para que lle deixase usar o móbil con chamada en altavoz, e elixiu as palabras xustas para que a persoa que estaba ao outro lado detectase o perigo.
"Dixen que as miñas fillas non me importan, estou ben aquí e quero estar con el, non coas millas fillas. Eu nunca diría iso", confesa entre bágoas.
Foron catro días de terror en que tivo ocasión de coñecer a que tipo de xente se enfrontaba, porque o seu agresor non estaba só.
"O ambiente é moi perigoso e a xente que o rodea, tamén. Son conflitivos".
Houbo un segundo intento de rapto que, por sorte, se frustrou, e seguen as ameazas. Son perigosos e coñecidos cun amplo currículo de delitos ás costas.
"Dálles igual todo. Xa estivo en prisión e a contorna deles non é fácil".
Malia todo, ela non quixo denunciar. A Garda Civil iniciou unha investigación de oficio, por violación e detención ilegal. O parte médico confirma esas lesións compatibles con relacións forzadas. O caso está no xulgado.
