O alcalde de Oleiros admite que os insultos a unha policía foron "desafortunados", pero ve "manipulación"

O alcalde de Oleiros, Ángel García Seoane, de Alternativa dos Veciños, admitiu que as súas descualificacións cara a unha axente da Policía Local do municipio - cando a súa esposa chamou á central para preguntar polo seu coche, despois de que llo levaron - foron "expresións desafortunadas".

En declaracións a Radio Oleiros, trasladadas aos medios de comunicación, asegura que foi "unha reacción humana, probablemente vehemente", aínda que as atribúe a un "interese político clarísimo".

Isto despois de que, segundo recolle o audio gravado, lle diga á axente "es tonta ou gilipollas" ao demandar explicacións sobre a retirada do coche e en relación a uns feitos ocorridos no mes de maio na localidade de Mera.

"Só escoito ataques privados, manipulacións, mentiras, podo aceptar as críticas políticas, pero non a mentira nin a manipulación. Unha cousa son dúas expresións que foron desafortunadas e outra moi distinta que unha conversación telefónica privada sexa obtida e difundida sen autorización", manifestou Ángel García Seoane.

Para explicar o que sucedeu, sinalou que na xornada anterior acababa de saír do hospital tras unha operación de corazón e que ese día quería regresar "rapidamente" á casa para tomar a medicación.

"Non podía conducir nese momento", dixo sobre o coche que levaba a súa muller. "O vehículo estaba nun espazo reservado para o alcalde, estaba sinalizado, non aparcado de calquera forma".

"O máximo responsable da Policía Local son eu", expuxo tamén.

Reaccións dos partidos 

En liña co manifestado por PP E BNG, desde o PSdeG cualificaron de "inadmisible" a actuación do alcalde, aínda que aseguran que non os "sorprende".

Nun comunicado, denuncian "o abuso de poder" e apoian a axente que atendeu a chamada, así como ao resto do persoal "fronte aos insultos e as ameazas do rexedor de abrirlles expedientes disciplinarios por cumprir coa lei", engaden.

A formación asegura que "a agresividade de Ángel García Seoane é unha constante que os concelleiros socialistas sofren en primeira persoa nos plenos".

Por outra banda, sobre a denuncia efectuada pola axente aseguran que esperan a que se depuren responsabilidades penais e administrativas "e en función diso esixir responsabilidades políticas", despois de que o PP pedise a dimisión do alcalde e desde o BNG remitísense neste sentido ao resultado das urnas.