A seca castiga as granxas galegas
A falta de choiva estragou as colleitas de millo e fai perigar a sementeira da herba
Secan os mananciais e achícanse os pozos de auga
Nas granxas galegas a seca afoga o sector. Din os gandeiros que non chove de forma continuada dende marzo e se suceden as consecuencias. As primeiras perdas notáronas no millo, a falta de agua provocou que non desenvolvera a espiga.
"Moita seca, moitos días sen chover e iso afecta. A mingua no silo do millo foi dun 15 ou dun 20 %", sinala Edmundo Castrillón, encargado dunha granxa.
E agora a falta de auga en pleno outono fai perigar a sementeira da herba.
"A herba está nacendo mal e o terreo non se deixa laborear ben. Esta herba que sementamos agora vaise recoller na primavera, pero se agora non nace ben vai repercutir en que vamos ter menos quilos", explica o gandeiro José Iglesias.
A seca tamén se nota moito nos abastecementos de auga necesarios para alimentar os animais e realizar os traballos das granxas.
"Hai escaseza de auga, están secando mananciais e os pozos achícanse".
"En agosto fixemos o cuarto pozo de auga porque os tres que tiñamos non daban abastecido as necesidades da explotación".
Ante a diminución das subministracións propias vense obrigados a mercar máis forraxes e pensos, disparando uns custos de produción que tamén se están a ver moi afectados polo elevado prezo dos combustibles.
