Demandan melloras na AP-9 ao seu paso por Ferrol
Queixas dos usuarios da comarca de Ferrolterra polo mal estado do firme da autoestrada
A perigosidade da AP-9 ponse de manifesto sobre todo cando chove
"Aí na zona de Pontedeume quixen pasar un camión e non fun capaz, había uns charcos de auga, estaba chovendo bastante, eh!, e cando o crucei custoume o meu, eh!", conta un condutor.
Leva 22 anos aberto o tramo final da AP-9 que remata en Ferrol e os usuarios reclaman un mellor mantemento.
"Si, ten fochancas, si, para o que se paga non se está en condicións".
"Está un pouco abandonada".
"Moitas veces hai fochancas".
"Fáltanlle luces de iluminación todo o arredor, porque non ten reflectores como debe ter unha autoestrada", apuntan varios usuarios.
En días coma hoxe non se aprecian tanto esas deficiencias. O problema chega cando chove.
"Esvara porque o chan non está ben, non agarra"
"A drenaxe é malísima, fas 'aquaplaning' como vaias a unha velocidade que tal, si".
Piden un asfaltado en condicións e non pequenos remendos.
"Fan un cacho ao mellor polo medio e despois o outro lado que non está homoxénea, está un pouco parcheada de aquí e despois está lisa; en fin, é o que hai".
"Eu non tiven problemas, pero porque extremo a precaución para non telos, pero que si é perigosa, si", conclúen.
