Declarado un incendio industrial nunha nave de almacenaxe no Barco de Valdeorras
Mobilizáronse Bombeiros, GES de Valdeorras, a Garda Civil e a Policía Local do Barco de Valdeorras; así como, Urxencias Sanitarias de Galicia-061 tamén foron alertados
É o segundo incendio nestas instalacións. O primeiro tivo lugar en febreiro de 2022 e tardouse en extinguilo 14 horas
Unha nave de almacenaxe do municipio ourensán do Barco de Valdeorras está a verse afectada por un incendio industrial.
Segundo informou o 112, o lume puido orixinarse nunha nave de almacenaxe de resina de Xagoaza Pinaster, na Avenida de Galicia. Foi a Policía Local do Barco de Valdeorras a que alertou o servizo, pasadas as 15:30 horas. O fume percíbese dente varios puntos do centro urbano do lugar.
Ata o lugar desprazáronse Bombeiros e GES de Valdeorras, a Garda Civil e a Policía Local do Barco de Valdeorras. Urxencias Sanitarias de Galicia-061 tamén foron alertados, aínda que de maneira preventiva.
É a segunda vez en menos de tres anos que se declara un incendio no mesmo territorio. En febreiro de 2022 xa ardera a resina e afectara outras naves próximas. Neste suceso, a extinción do lume prolongouse máis de 14 horas e foi preciso mobilizar bombeiros e GES de varios puntos da provincia de Ourense e do sur de Lugo.
