Dae Dae Grant non dá pistas sobre o seu futuro: “Non estou a pensar en iso”

O base estadounidense Dae Dae Grant, unha das sensacións da Liga Endesa, eludiu este martes pronunciarse sobre o seu futuro no Río Breogán, co que termina contrato o próximo mes de xuño.

"Que eu teña coñecemento, si que houbo xa algunha conversación co club, pero persoalmente estou centrado en xogar da mellor maneira posible estes dous últimos partidos. Ese é un tema que leva o meu axente”, declarou Grant tras recibir o premio Estrella Galicia ao mellor xogador breoganista do mes de abril.

O norteamericano, de 24 anos, chegou ao conxunto lucense o pasado mes de decembro para suplir a lesión de longa duración do seu compatriota Charlie Moore. Desde entón, disputou 21 partidos na Liga Endesa, nos que promediou 14,8 puntos, 2,8 rebotes e 3,1 asistencias para unha valoración media de 12,1 créditos.

“Cando cheguei o meu principal obxectivo era axudar o equipo para gañar o maior número de partidos para saír de aí abaixo. Por aí creo que fixen un bo traballo”, afirmou.

A pesar da insistencia dos xornalistas, Grant non deu moitas pistas sobre o seu futuro:

“Estou encantado co club, cos compañeiros e cos afeccionados. Todos me recibiron moi ben, pero agora non estou a pensar no meu futuro”.

O base agradeceu “a confianza” que Luis Casimiro depositou nel durante toda a tempada, pero especialmente tras a saída do seu compatriota Darrun Hilliard porque a partir de aí tivo que converterse no líder ofensivo do equipo.