Conta atrás para as probas de acceso á universidade en Galicia

Quedan xa poucos días para que máis de 13.400 estudantes galegos se enfronten a uns exames decisivos para o seu futuro, as probas de acceso á universidade. Agora toca repasar e controlar os nervios que se incrementan conforme se acerca o día.

"Hai nervios, pero levamos todo o ano preparándonos para os exames. O maior problema é organizarse para o repaso diario, sempre deixas algo, pero bueno, imos ben."

"Eu personalmente estou bastante tranquilo. Teño amigos que están máis tranquilos e outros algo máis nerviosos. Eso depende de cada un e cado un tenta levalo da mellor maneira posible."

E mentres os estudantes fan os últimos repasos, no CIUG, o organismo encargado da coordinación da PAU, xa teñen preparada toda a loxística para a custodia e o reparto dos exames.

"Estarán custodiados nun búnker do que non decimos a localización por cuestións de seguridade. E o luns a primeira hora comezaremos co reparto por todo o país, nas 37 comisións delegadas que temos este ano, repartindo os exames sempre en fungóns de seguridade e custodiados como teñen que ir." ,explica Iván Area, o responsable do CIUG, a Comisión Interuniversitaria de Galicia.

E para garantir a igualdade de oportunidades póñense en marcha medidas para evitar que ninguén copie, especialmente empregando as novas tecnoloxías.

"Os detectores de frecuencia que xa levamos dende o ano 2019 na CIUG con esta iniciativa. Eu creo que é unha forma importante e necesaria, lamentablemente necesaria para que o alumnado o que faga no exame sexa o que realmente sabe." ,di Iván Area

Estes detectores axudan a descubrir dispositivos ocultos, pero tamén é obrigatorio ter o móbil e outros aparellos intelixentes apagados e gardados durante todo o exame. Ademáis os profesores encargados de vixiar as aulas poderán revisar calculadoras, bolígrafos ou gafas en calquera momento. E cómpre lembrar que se vai invalidar o exame a aqueles aos que sorprendan no incumprimento das normas.