Consumo alerta da posible presenza de achas de madeira en queixo relado de tres marcas
O produto foi distribuído en 6 comunidades autónomas, entre elas Galicia
Recoméndase ás persoas que o teñan no seu domicilio que se absteñan de consumilo
Un dos queixos da alerta sanitaria (Aesan)
A Axencia Española de Seguridade Alimentaria e Nutrición (Aesan), dependente do Ministerio de Consumo, emitiu este luns unha alerta pola posible presenza de corpos estraños, en concreto achas de madeira, en queixo relado das marcas Alteza, Albéniz e Froiz.
O produto foi distribuído en Galicia, Andalucía, Cantabria, Castela-A Mancha, Castela e León e Navarra, aínda que a Aesan non descartou que poidan existir redistribucións noutras comunidades autónomas.
A alerta foi emitida a través do Sistema Coordinado de Intercambio Rápido de Información (Sciri) polas autoridades sanitarias da Comunidade Foral de Navarra. Os produtos afectados son os lotes 2426026 dos queixos relados gouda das marcas Alteza e Albéniz, ambos con data de caducidade para o 5 de xuño de 2026 e o lote 2426026 do queixo relado mozzarella e provolone, da marca Froiz, con data de caducidade para o 5 de xuño de 2026.
A información foi trasladada ás autoridades competentes das comunidades a través do Sciri para que se verifique a retirada dos produtos afectados das canles de comercialización. A Aesan recomendou ás persoas que teñan no seu domicilio produtos afectados por esta alerta que se absteñan de consumilos.
