O diésel encareceu un 30 % e a gasolina, un 14 % en Europa desde o comezo da guerra

O diésel supera os 2 euros o litro de media na Unión Europea, o que supón que encareceu arredor dun 30 % no mercado único desde o inicio da guerra de Irán a finais de febreiro, segundo se recolle nos datos feitos públicos este xoves pola Comisión Europea.

O boletín semanal de prezos dos carburantes do Executivo comunitario mostra que o diésel, con impostos, alcanzou o pasado 30 de marzo os 2.075,7 euros por 1.000 litros (2,07 euros por litro), fronte aos 1.594,4 euros rexistrados o 23 de febreiro (1,59 por litro), cinco días antes de que comezase a guerra, o que equivale a un incremento do 30,2 % en pouco máis dun mes.

A gasolina sen chumbo de 95 octanos tamén seguiu unha tendencia alcista, aínda que máis moderada, e sitúase arredor de 1,87 euros por litro de media no conxunto da UE, o que supón un incremento do 14,3 %.

O informe vincula o encarecemento ao conflito en Oriente Medio, que tensionado os mercados enerxéticos internacionais e encareceu tanto o cru como o gas e os produtos refinados.

Aumento xeneralizado pero con diferenzas entre os países europeos

O aumento foi xeneralizado, aínda que con fortes diferenzas entre distintos países da Unión Europea.

No caso do diésel, os prezos oscilan entre 1,21 euros por litro en Malta e 2,46 euros en Países Baixos, con Hungría, Eslovenia e Bulgaria entre os máis baratos e Dinamarca, Alemaña, Finlandia e Bélxica entre os máis caros.

En España, o gasóleo situábase en 1,78 euros por litro ao 30 de marzo, mentres que a gasolina sen chumbo de 95 octanos alcanzaba 1,56 euros por litro, segundo o boletín da Comisión Europea.

Representa un incremento do 24,9 % no diésel e do 5,9 % na gasolina entre o 23 de febreiro e o 30 de marzo.

España cóntase entre os Estados membros que nas últimas semanas anunciaron reducións temporais dos impostos especiais ou o IVE sobre os carburantes, como Italia, Portugal, Irlanda ou Polonia.