Os apicultores alertan dunha presión sen precedentes da velutina en colmeas e froiteiras

O asedio da avespa asiática nas colmeas é asfixiante. Os apicultores din que pode haber entre 13 e 20 velutinas custodiando cada colmea, o que causa graves prexuízos ás abellas.

"Hai moitas zonas onde están asediadas totalmente as colmeas e as abellas non poden saír nin para buscar pole nin auga para consumir nin para levala dentro da colmea e baixar a temperatura interna", advite Esther Ordóñez Dios, veterinaria da Agrupación Apícola de Galicia.

Isto diminúe a poboación de abellas e as velutinas acaban entrando nas colmeas. A situación é tan complicada que algúns apicultores están trasladando as colmeas a zonas máis seguras.

"Houbo que trasladar colmeas de zonas que estaban moi asediadas a zonas un pouco máis altas, con menos problemática de velutina. Unha vez que as xuntan é máis doado ir alí a cambiar trampas, atraínte e controlar a velutina".

E non só atacan ás abellas, as velutinas tamén causan danos graves nas froiteiras. Isto ten os seus riscos.

"Por exemplo, nesta mazá parece que está de marabilla e boto a man e polo outro lado están as velutinas que saen de dentro e poden picar".

Moitos colocan todo tipo de trampas para coller as velutinas, pero, a pesar de atrapar moitas, non conseguen controlalas.