Condenan un monitor a 10 anos de prisión por agredir sexualmente unha nena de seis anos nun campamento Pontevedra

A Audiencia de Pontevedra condenou a dez anos de prisión un monitor dun campamento ecuestre de Pontevedra que agrediu sexualmente en varias ocasións unha nena de tan só seis anos de idade.

Os feitos producíronse en xuño de 2023. O monitor encargábase de ensinar os nenos e nenas que acudían ao campamento para coidar dos cabalos que había na granxa, así como a organizar xogos diversos para entreter os menores durante a súa estancia.

Durante eses días, o acusado "coa finalidade de atentar contra a integridade sexual da menor", colleu a nena en brazos en varias ocasións.

Aproveitaba eses momentos para apartarlle a roupa interior e tocar as súas partes íntimas. Debido a eses feitos, aínda que a menor non sufriu danos psicolóxicos significativos, desenvolveu unha reacción de desconfianza cara ao seu coidado por terceiras persoas.

Xunto coa pena de cárcere, o tribunal impúxolle cinco anos de liberdade vixiada, que comezarán a contar cando saia de prisión.

Ademais, o monitor non poderá achegarse a menos de 100 metros da menor durante doce anos e estará inhabilitado para traballar con menores durante os próximos quince anos.

O acusado terá que pagar as custas procesuais e indemnizar a nai da vítima, na súa representación ao ser a súa titora legal, con 5.000 euros.