Un exempregado de banca acepta 23 anos de cadea por tentar matar e roubar unha clienta en Xermade
Pediu perdón "á señora María e a súa familia"
Recoñeceu que quixo matar a vítima para apoderarse do seu móbil, que usou para roubarlle 20.000 euros
A muller é gran dependente desde o ataque
Luis Rancaño Bouso, exempregado de banca, foi condenado a 23 anos de cadea por asasinato en grao de tentativa, roubo con violencia e estafa continuada. A Fiscalía pedía inicialmente 18 anos, pero aumentou a petición.
No xuízo celebrado na Audiencia Provincial de Lugo recoñeceu que en 2022 asaltara a vivenda dunha veciña da parroquia xermadesa de Candamil e que a golpeara na cabeza cun obxecto contundente coa intención de matala, apoderarse do seu teléfono móbil e ter así acceso á súa banca electrónica. O autor dos feitos coñecía de antemán o estado das súas contas, das que extraeu uns 20.000 euros.
Como consecuencia do golpe sufrido, a muller foi ingresada na UCI do HULA, e dende entón é unha gran dependente que se despraza en cadeira de rodas.
Pola súa parte, o agresor encóntrase en prisión preventiva sen fianza dende hai catro anos. Ante o tribunal, aceptou as penas solicitadas pola Fiscalía, que inclúen o afastamento da vítima a 1.000 metros durante 48 anos.
Así e todo, non houbo acordo tocante á responsabilidade civil. A Fiscalía pide o pagamento de máis de medio millón de euros, mentres que a acusación particular eleva esa contía a case un millón e medio de euros.
