Autorizada a pesca de anguía en Vigo e Arousa tras tratar o Ministerio de declarala en perigo de extinción

O Diario Oficial de Galicia (DOG) publicou este venres as autorizacións dos plans de pesca de anguía para as confrarías de pescadores da rías de Arousa e Vigo.

O período autorizado, en ambos os casos, será desde o 1 de abril ata o 30 de setembro de 2026 e unicamente poden participar as embarcacións que teñan no seu permiso de explotación licenza para a arte de nasa buraco ou nasa para a anguía. Os tripulantes deberán estar debidamente enrolados e a bordo na embarcación en que leven a cabo a actividade.

En canto ao horario de pesca para ambos os plans, o uso de nasas para anguía será exclusivamente diúrno e a utilización de nasas buraco será tanto de día como de noite.

Con todo, as nasas non se poderán calar nin permanecer no mar as fins de semana a partir das 12:00 horas do sábado e a embarcación non poderá saír do porto ata as 12:00 horas do luns seguinte.

Así mesmo, con base no establecido no plan de xestión da anguía en Galicia, ningunha embarcación poderá empregar máis de 80 nasas, independentemente da zona de pesca.

En canto ás zonas autorizadas na ría de Vigo establécense, por dentro da zona delimitada entre a liña de referencia de Punta do Cabo e Punta do Pereiro ata a liña de referencia de limitación de augas continentais, de Punta Muxeira a Punta Ulló, para traballar entre o 1 de abril e o 28 de xuño.

Entre o 30 de xuño e o 30 de setembro a segunda zona de traballo autorizada abarca a totalidade da enseada de San Simón.

En canto ás confrarías de Arousa, a pesca poderá levarse a cabo na totalidade da ría, nas zonas autorizadas.

Para evitar a morte de capturas incidentais, está prohibido que as nasas buracos queden en seco e as artes deberán estar balizadas cunha boia.

Ademais, as especies capturadas deberán estar en época de extracción e superar o tamaño mínimo. Os mariñeiros deberán evitar a capturas de anguías prateadas e todas as que se capturen deberán devolvelas ao mar co obxectivo de asegurar a súa reprodución.

A anguía estivo este ano no foco político e do sector despois de que o Ministerio para a Transición Ecolóxica e o Reto Demográfico (MITECO) pedise declarala especie en perigo de extinción dentro da Listaxe de Especies Silvestres en Réxime de Protección Especial (LESRPE). Unha proposta que, en febreiro, non obtivo o respaldo necesario por parte das comunidades autónomas.

Así, a finais do mes de marzo, o Parlamento de Galicia aprobou, na comisión de pesca cos votos do PP e a abstención da oposición, "paralizar" calquera iniciativa de catalogación estatal da anguía en máxima protección.

En concreto, a proposición pide a paralización "ata avaliar de forma obxectiva e diferenciada os resultados dos plans autonómicos de xestión existentes".