Complícase o tráfico no avance da operación saída máis importante do verán
Complícase o tráfico no avance da operación saída máis importante do verán
Hai retencións en Madrid, Barcelona, Xirona, Castelló, Sevilla, Burgos, Áraba e Guipúscoa
A operación Paso do Estreito podería provocar aglomeracións na contorna dos portos
.jpg)
Tráfico en Sevilla na A-49 en dirección Huelva. EFE/Raúl Caro
A situación do tráfico empeora conforme avanza a xornada da operación saída de primeiros de agosto, a máis importante do verán, con retencións nalgunhas saídas de Madrid e Barcelona. Tamén hai circulación lenta en puntos de Xirona, Castelló, Sevilla, Burgos, Áraba e Guipúscoa.
Segundo informa a Dirección Xeral de Tráfico (DXT), pasadas as once da mañá deste sábado, hai dous accidentes que dificultan a fluidez en Sevilla, na A-49 en Huévar del Aljarafe en sentido saída da capital, e en Castelló na AP-7 en Almenara cara a Valencia.
Ademais rexístranse retencións para saír de Madrid pola A-1 á altura do circuíto do Xarama e na A-6 por Las Rozas, e para saír de Barcelona pola AP-7 en varios puntos.
En Xirona a circulación reséntese na AP-65 en Llagostera en sentido Platja d'Aro, e en Castelló na AP-7 en Peñíscola.
En Sevilla o tráfico acumúlase en sentido saída na A-4 en Dos Hermanas e na AP-4 en Cabezas de San Juan.
En Burgos hai retencións na A-1 no Condado de Treviño e na AP-1 en Pancorbo e Briviesca (todas cara a Burgos). En Áraba, a circulación é lenta na A-1 en Vitoria cara a Burgos, e en Guipúscoa na AP-8 en Orio.
A DXT puxo en marcha este venres a operación especial polo inicio do mes de agosto, a máis importante en canto a movementos do verán xa que se prevén case 9 millóns de desprazamentos.
Paso do Estreito
Ademais da operación especial polos desprazamentos de inicio de agosto, esta fin de semana está en marcha a operación Paso do Estreito, polo que se poderían producir aglomeracións nas proximidades dos portos.
