Comisan 798 cacharros con 30 quilos de polbo collido ilegalmente na zona da Guarda

O Servizo de Gardacostas de Galicia retirou 798 cacharros con 30 quilos de polbo capturado de maneira ilegal en distintos operativos realizados nos últimos días na zona da Guarda.

Segundo detallou a Consellería do Mar, nunha das actuacións a patrulleira Punta da Guía localizou e retirou 148 cacharros, dos que se liberaron arredor de 14 quilos de polbo, exemplares que non alcanzaban a medida e peso regulamentarios.

Nun segundo operativo, a patrulleira Mar de Galicia recuperou 650 cacharros e procedeu á liberación doutros 16 quilos de cefalópodos. Unhas cifras que se suman aos 720 cacharros comisados a pasada semana nesta mesma zona, o que, apuntou o departamento autonómico, "evidencia unha actividade furtiva especialmente intensa nesta franxa do litoral".

Os controis realizados por Gardacostas forman parte dos labores de vixilancia deste departamento para protexer a explotación sostible desta especie e garantir o cumprimento das normas pesqueiras, evitando a competencia desleal e contribuíndo a preservar este recurso mariño.

No que vai de ano, este traballo permitiu retirar preto de 15.000 cacharros en todo o litoral galego, unha cifra moi superior aos 2.239 e 3.500 cacharros retirados no 2024 e 2023, respectivamente, a estas mesmas datas.