Comeza o San Froilán cunha axenda chea de actividades para todos os gustos
O polbo e as atraccións, principais reclamos da festa grande de Lugo
O tempo acompañou e cuns agradables 21 graos ao mediodía era o momento de gozar dalgunha das máis de 60 atraccións e de curiosear entre os máis de 90 postos de venda ambulante.
Había ganas de San Froilán en Lugo e foron moitos os que se lanzaron á rúa para desfrutar da festa, tanto lucenses coma visitantes.
"Vimos de Sanxenxo e é a primeira vez que vimos ao San Froilán".
"Pódese montar no barco viquingo e moitas máis".
"Somos de Vigo e estivemos facendo unha ruta todo por Lugo. Estivemos por Foz, por Mondoñedo e agora viñemos a tomar o polbo aquí á feira".
E xa cara ao mediodía toca degustar outro dos grandes reclamos da festa, o polbo, ben nalgún dos restaurantes da cidade ou ben nalgunha das casetas. O prezo da ración mantense igual co ano pasado.
"A 15 euros, está igual co ano pasado. San Froilán e polbo van da man sempre".
"Está moi bo, se queredes probar déixámosvos probar unha talladiña".
"Está moi bo, todo fenomenal. Está todo moi bonito e moita xente".
A música é outra das grandes protagonistas. Pola tarde o festival de corais amenizará a quen se achegue á praza de Santa María.
A última hora a orquestra Marbella na praza Maior e o artista catalán Nil Moliner na horta do seminario poñeranlle o colofón a este primeiro día dunhas festas que non fixeron máis que comezar.
