Citación extraordinaria para vacinar contra a gripe a poboación de 60 a 69 anos
O Sergas vailles enviar unha mensaxe para que vaian vacinarse nos centros hospitalarios a vindeira fin de semana
O obxectivo da medida é diminuír a incidencia da gripe na poboación galega ante o adianto do andazo
Unha sanitaria prepara un vial. Alejandro Martínez Vélez/Europa Press
A Xunta pon en marcha a vindeira fin de semana unha campaña extraordinaria de vacinación fronte á gripe nos hospitais galegos dirixida ás persoas con idades comprendidas entre os 60 e os 69 anos que aínda non recibiron cita.
A Consellería de Sanidade, a través da Dirección Xeral de Saúde Pública, enviará un SMS para que estas persoas poidan vacinarse fronte a un virus que, na presente campaña, está a adiantar a súa vaga pandémica.
Deste xeito, durante os días 29 e 30 de novembro, sábado e domingo, os sete hospitais de cabeceira do Servizo Galego de Saúde facilitarán a vacinación en horario de 10:00 a 14:00 horas e de 16:00 a 20:00 horas.
Pola súa banda, os hospitais comarcais reforzarán a campaña de vacinación que se está a levar a cabo nos centros de atención primaria, administrándoa durante a xornada do sábado 29 de novembro.
Taxa de cobertura
Ata o de agora, Galicia conta con máis do 75% das persoas maiores de 80 anos vacinadas fronte á gripe, unha taxa de cobertura que se sitúa ao redor do 60% no caso das persoas con idades comprendidas entre os 70 e 79 anos.
A Xunta convida a todas as persoas a vacinarse fronte á gripe e á covid-19 co obxectivo de previr a aparición de enfermidades e minorar a súa incidencia na poboación.
