Médicos sen MIR desatascan os centros de saúde

Un 35 % do traballo dos médicos de familia é para realizar tarefas administrativas. Liberalos desa carga burocrática permítelles desatascar as súas axendas, e ese é o obxectivo que marcou o Sergas cando creou esta unidade. A iniciativa pioneira en España cumpre catro meses e o balance é positivo.

"A nosa idea era empezar coa renovación de prescrición de tratamentos crónicos e a medida que fomos empezando fóronnos incorporando outras competencias, como informes de saúde, e tamén estamos atendendo o programa de medicación non demorable", explica María José Gil, coordinadora da Unidade Técnico-Administrativa de Apoio á Atención Primaria.

"Ola, bos días, María Teresa? Son o doutor Montien, do Centro de Apoio á Atención Primaria. Voulle renovar toda a medicación ata o 1 de marzo", un dos facultativos atendendo a unha doente.

E así unha tras outra, e cada chamada require un traballo previo.

"Revisar punto por punto todos os doentes, vemos a medicación que se lles puxo por parte do facultativo responsable, do médico de cabeceira e nós revisamos que estea todo correcto", apunta José Luis Montiel, técnico de saúde.

Os vinte técnicos son médicos que aínda non fixeron a especialidade ou están á espera de homologación porque veñen doutros países.

"A xente está algunha xa preparando o MIR. Se se presentan e o aproban, virá outra xente. É dinámica en persoal e dinámica tamén nos centros de saúde que están incluídos", recalca a coordinadora do servizo.

Ao principio eran 100, agora son 119. Nestes catro meses xestionaron máis de 66.000 receitas.

"Cada un ten unha axenda mínima de 50 doentes diarios, ou sexa que se multiplicas 15 por 50, son uns 750 mínimo, doentes diarios de renovación de prescrición de tratamento crónico", conclúe María José Gil.