Cinco anos da declaración do estado de alarma pola pandemia do coronavirus
Era o segundo estado de alarma que se decretaba en España, pero a primeira vez que se confinaba a poboación
A medida era para quince días, pero, finalmente, foron tres meses de peche
Tal día coma hoxe, hai 5 anos, España declaraba o estado de alarma para facer fronte á maior crise sanitaria da súa historia. O país paralizábase a partir de entón e comezaban unhas medidas restritivas de mobilidade sen precedentes. As rúas baleiráronse e decretouse o confinamento total, que durou cen días e que deixou imaxes para a historia, como os aplausos aos sanitarios nos balcóns ás oito da tarde. Comezaba a loita contra o coronavirus, que deixou en dous anos máis de 150.000 falecidos en España. Preto de 15 millóns de vítimas mortais en todo o mundo. Pero son poucos os expertos e cidadáns que cren que a pandemia nos fixo mellores.
E neste aniversario volvimos ver o que fora voceiro da pandemia, o director do Centro de Coordinación de Alertas e Emerxencias Sanitarias, Fernando Simón. Reapareceu nun acto organizado polo Ministerio de Sanidade. Simón recoñeceu que o confinamento, que foi a medida máis extrema, puido facerse de forma máis suave. E que a pandemia fixo aflorar a visión de que o mundo é global, e que hai que traballar de maneira coxunta para dar unha resposta correcta ante unha crise sanitaria como a do covid. Para a ministra de Sanidade hoxe estamos mellor preparados, pero queda traballo por facer.
