Arrinca o ensaio Combogal, a vacinación conxunta contra a gripe e a COVID-19 para maiores de 65 anos
Arrinca o ensaio Combogal, a vacinación conxunta contra a gripe e a COVID-19 para maiores de 65 anos
O ensaio desenvolverase nas sete áreas sanitarias, nos hospitais das sete cidades e nos hospitais comarcais
Rueda reivindica a Galicia como referente mundial en vacinación
A Xunta anima a participar no ensaio clínico Combogal, pensado para avaliar a mellor estratexia de vacinación contra a gripe e a COVID-19 nas persoas de 65 ou máis anos, que se iniciará este sábado 17 de outubro nos 14 hospitais públicos da comunidade.
Nos últimos días, enviáronse mensaxes SMS con información sobre esta iniciativa á poboación seleccionada, ao redor de 730.000 persoas maiores de 65 anos.
O ensaio desenvolverase no marco da campaña ordinaria de vacinación, daquela, na propia citación para acudir ao centro de saúde informarase tamén da posibilidade de desprazarse ao hospital para participar no estudo.
O obxectivo é comprobar se unha vacina combinada contra a gripe e a COVID-19 reduce o risco de hospitalización, complicacións e morte asociadas a estas infeccións, en comparanza coa administración simultánea dunha vacina antigripal de alta dose e outra contra a COVID-19 en inxeccións separadas.
Destacan que a vacina combinada xa foi testada e autorizada, e por tanto o estudo busca determinar a estratexia de protección máis idónea para a poboación maior.
As persoas interesadas en participar poderán reservar cita a través da aplicación Sergas Móbil ou no teléfono habilitado para este fin, o 900 842 217, que estará operativo de 10:00 a 20:00 horas.
Haberá ocos dispoñibles desde esta fin de semana e durante cinco fins de semana consecutivas nos 14 hospitais públicos do Sergas.
Hospitais participantes
O ensaio desenvolverase nas sete áreas sanitarias, nos hospitais das sete cidades e nos hospitais comarcais. Os centros de vacinación serán os seguintes: na área da Coruña, e Cee, o Complexo Hospitalario Universitario da Coruña (CHUAC) e Hospital Virxe da Xunqueira; na área sanitaria de Ferrol, no Complexo Hospitalario Universitario de Ferrol (CHUF), no Arquitecto Marcide; na área sanitaria de Santiago e Barbanza, no Complexo Hospitalario Universitario de Santiago (CHUS), no Hospital Clínico, e tamén no Hospital da Barbanza.
Na área sanitaria de Lugo, A Mariña e Monforte de Lemos, no Hospital Universitario Lucus Augusti (HULA), Hospital dá Mariña e Hospital de Monforte. Na área sanitaria de Ourense, Verín e O Barco de Valdeorras, no Complexo Hospitalario Universitario de Ourense (CHUO), no Hospital Santa María Nai, Hospital de Verín e Hospital de Valdeorras.
Para rematar, na área sanitaria de Pontevedra e O Salnés, no Complexo Hospitalario Universitario de Pontevedra (CHOP), Hospital Provincial, e no Hospital do Salnés. Na área sanitaria de Vigo, no Complexo Hospitalario Universitario de Vigo (CHUVI), Hospital Álvaro Cunqueiro.
Vacinación en centros escolares
Por outra banda, a delegada da Xunta na Coruña Belén do Campo, xunto ao alcalde da Laracha José Manuel López Varela, visitou o CEIP Ramón Otero Pedrayo para coñecer o avance do programa piloto de vacinación infantil contra a gripe nos centros educativos. Neste colexio recibiron a vacina máis de 250 escolares.
A iniciativa, impulsada conxuntamente polas consellerías de Sanidade e de Educación, Ciencia, Universidades e Formación Profesional, iniciouse o pasado 13 de outubro nos centros participantes e busca facilitar a inmunización da poboación infantil, achegando a prevención ao ámbito educativo e contribuíndo a reducir as infeccións respiratorias.
Nesta segunda campaña, o programa esténdese aos 75 centros educativos das sete áreas sanitarias galegas, 20 máis que no ano anterior, cunha representación de contornas urbanas, semiurbanas e rurais. A previsión é que poidan acceder a esta iniciativa 26.536 nenos, ao redor de 7.500 máis que na campaña precedente, co obxectivo de alcanzar unha cobertura vacinal infantil do 60 %.
