As residencias inician a inmunización contra a gripe e a covid na estrea da campaña de vacinación
O Sergas marca como obxectivo vacinar contra a gripe 926.000 maiores de 60 anos
A campaña prolongarase ata o 31 de decembro e desenvolverase de forma progresiva, incorporando os diferentes grupos de idade
A Xunta iniciou este luns a campaña de vacinación fronte á gripe e a covid-19, que arrinca nas residencias de maiores e os centros de atención a persoas con discapacidade, e que ten como obxectivo inmunizar a 926.000 persoas maiores de 60 anos.
O conselleiro de Sanidade, Antonio Gómez Caamaño, e a conselleira de Política Social e Igualdade, Fabiola García, participaron no acto de apertura da campaña, celebrado na residencia de maiores A Eiriña, en Pontevedra, onde os residentes recibiron as primeiras doses.
O inicio da vacinación nestes centros responde, segundo explicou Gómez Caamaño, á especial vulnerabilidade dos seus usuarios ante as infeccións respiratorias e as posibles complicacións derivadas delas.
Así, o titular de Sanidade detallou que a campaña contempla en Galicia unha poboación diana de aproximadamente 926.000 persoas de 60 ou máis anos para a vacinación contra a gripe. No caso do covid-19, a poboación á que se dirixe a inmunización sitúase arredor das 549.000 persoas de 70 ou máis anos.
A campaña prolongarase ata o 31 de decembro e desenvolverase de forma progresiva, incorporando aos diferentes colectivos e grupos de idade en distintas fases.
Seguintes grupos en vacinarse
Tras o inicio nas residencias de maiores e os centros de discapacidade, o próximo 13 de outubro comezará a vacinación infantil nos centros de saúde e nos 75 colexios incluídos no proxecto piloto impulsado pola Xunta, que xa se puxo en marcha o pasado ano. Este programa ten como poboación diana a uns 26.500 alumnos.
Posteriormente, o 19 de outubro incorporaranse á campaña as persoas de 70 ou máis anos e os profesionais sanitarios. A vacinación das mulleres embarazadas está prevista a partir do 2 de novembro.
Unha das novidades desta campaña é a ampliación da vacina antigripal de alta carga ás persoas de entre 65 e 69 anos. Deste xeito, a protección reforzada estenderase en Galicia a toda a poboación de 65 ou máis anos.
Gómez Caamaño situou a protección das persoas maiores entre as prioridades da campaña, ao tratarse dun dos colectivos con maior risco de sufrir complicacións asociadas ás infeccións respiratorias.
Segundo os datos facilitados pola Consellería de Sanidade, na campaña anterior o 72,36 % dos maiores de 65 anos vacináronse contra a gripe en Galicia, fronte ao 58,47 % rexistrado como media estatal.
Entre as persoas de 80 ou máis anos, a cobertura alcanzou o 81,22 % na comunidade galega, mentres que a media de España situouse no 64,75 %.
Para a campaña que agora comeza, a Xunta marcouse como obxectivo alcanzar unha cobertura do 75 % entre a poboación de 60 ou máis anos.
Así mesmo, pretende lograr unha taxa de vacinación do 60 % entre os nenos de seis meses a 11 anos, as mulleres embarazadas e os traballadores sanitarios.
