Centos de persoas acoden na Coruña ao enterro dos falecidos no incendio de Vigo
Centos de persoas acoden na Coruña ao enterro dos falecidos no incendio de Vigo
Centos de persoas encheron este mediodía o cemiterio de Feáns, na Coruña, para despedir os catro familiares falecidos no incendio de Vigo.
Pasadas as 11:30 horas deste venres, foron achegándose ao camposanto coruñés xunto aos catro coches que formaban a comitiva.
Os familiares que despedían a Rosana e tres dos seus fillos, dúas nenas e un neno, non puideron conter os berros da dor nunha mañá marcada pola intensa chuvia.
Ademais de achegados e familiares, ao enterro acudiron representantes das familias xitanas de Galicia. A comunidade xitana declarou tres días de loito en sinal de respecto cara ás vítimas e as súas familias.
No incendio que afectou ao inmoble número 6 da rúa Alfonso X o Sabio de Vigo na madrugada do pasado mércores, no que vivían unhas 30 persoas, faleceron unha muller e tres fillos seus, todos menores de idade.
O pai e outra filla, os cales foron rescatados polos bombeiros, permanecen hospitalizados en Vigo e A Coruña, respectivamente. Outras sete persoas resultaron feridas.
