Catro feridos, dous deles menores, ao bater co coche contra un muro en Castrelo do Val

Catro persoas, dúas delas menores, resultaron feridas na tarde deste domingo ao saírse da vía co vehículo no que viaxaban e chocar contra un muro en Castrelo do Val (Ourense).

Segundo o 112 Galicia, os feitos ocorreron pasadas as 19:30 horas. Un particular alertou os servizos de emerxencia despois de que un coche se saíra da vía na OU-114, á altura de Gondulfes, e impactara contra o muro dunha casa.

Ata o lugar trasladáronse efectivos do 061, Bombeiros de Verín, o GES de Laza e a Garda Civil de Tráfico.

Os bombeiros confirmaron que se trataba dunha familia de catro persoas: nai, pai e dous fillos menores. Todos foron trasladados por Urxencias Sanitarias e foron atendidos por persoal médico.