Castaña conxelada, un produto cada vez máis demandado

A empresa Arfrusa, situada no polígono industrial de San Cibrao das Viñas, leva máis dunha década adicándose ao mundo da castaña. Comercializa ao redor de dous millóns de quilos por tempada.

Dende o ano pasado, destina preto do 40 por cento da súa produción ao produto pelado e conxelado. Trátase dun proceso complexo que comeza no forno e remata nas cámaras onde as castañas se conservan a menos 20 graos.

A maior parte do que producen vai para fóra das nosas fronteiras. Dinstintos países europeos onde se destinan á venda directa nos lineais ou se empregan para elaboración de distintos produtos como purés ou aperitivos.

A demanda, subliña Suso López, xerente da empresa, está medrando. En España, por agora, queda unha porcentaxe pequena que venden fundamentalmente á hostalería.

Unha aposta pola transformación co que buscan incrementar o valor engadido dun froito ligado a nosa tradición e do que Galicia é o maior produtor de España.