Carmen García Mateo toma posesión como primeira reitora da Universidade de Vigo
A nova reitora pediu financiamento para a captación de talento, consolidar os grupos de investigación ou potenciar a interaccion internacional
Carmen García Mateo tomou este xoves posesión do cargo de reitora da Universidade de Vigo, converténdose na primeira muller en ocupar este posto en 36 anos de historia da institución. A nova reitora promete traballar por unha universidade "excelente, moderna e igualitaria".
O acto celebrouse na Facultade de Ciencias Económicas no campus da Universidade de Vigo e nel participaron representantes da política, a empresa e a sociedade galega, encabezados polo presidente da Xunta de Galicia, Alfonso Rueda. O mandato de Carmen García Mateo, enxeñeira de Telecomunicacións e catedrática de Teoría do Sinal, será de seis anos improrrogables.
No seu discurso revindicou tres bandeiras: "a do coñecemento e a excelencia; a da lingua e a ciencia aberta; e da modernidade e o progreso". A nova reitora pedíulle ao presidente da Xunta "confianza e financiamento" para retos como a captación de talento, consolidar os grupos de investigación ou "poteciar unha ambicionsa interaccion internacional".
Na clausura do acto, Alfonso Rueda ofreceulle a "colaboración leal" para o obxectivo compartido de manter unha universidade "pública, de calidade e innovadora". O presidente da Xunta apelou ao diálogo para afrontar desafíos como o novo plan de financiamento universitario ou a mellora do mapa de titulacións.
