Capturado no Porriño un porco vietnamita que vivía na contorna da igrexa de San Salvador

Despois de dúas semanas andando libremente polos campos da parroquia porriñesa de Budiño, o animal foi capturado este venres por axentes do Seprona e do Servizo de Medio Ambiente da Xunta de Galicia para ser trasladado ao centro de recuperación de fauna silvestre de Cotobade.

Trátase dunha femia de porco vietnamita que alguén ceibou e que os propios veciños lle daban alimento.

Con todo, é unha especie invasora, cuxa tenza e cría está prohibida, e debe ser retirada do medio natural.

O cocho apareceu un bo día polas inmediacións da igrexa de San Salvador de Budiño. Atopou baixo esta árbore un bo lugar para acubillarse, con campo aberto por diante e o bosque tamén moi preto.

"Temos a idea de que o animal é dunha casa. Escapouse porque son moi aventureiros, o problema é que son crías", asegura José Carlos Eiras, xefe do Servizo de Axentes Medio Ambientais Distrito XVIII.

Este venres o asunto saíu na prensa e foi daquela cando os servizos de protección da natureza decidiron actuar.

"Non se lle pode dar comida porque é un animal salvaxe. Fastidia pero non se pode, está totalmente prohibido por lei", engade José Carlos Eiras. 

Presentáronse no lugar axentes do Seprona da Garda Civil e do Servizo de Medio Ambiente da Xunta. Coa axuda dun veterinario do centro de fauna de Cotobade durmiron o porco para trasladalo ata alí.

"O problema que temos con este animal é que o ser invasor as crías poden mesturarse con xabarís e porcos da casa, entón iso non pode ser. O importante e que teñamos animais propios, non importados" explica o xefe do Servizo de Axentes Medio Ambientais Distrito XVIII.

As especies invasoras deben ser retiradas do medio natural. O animal carece de chip de identificación. Descoñécese a súa procedencia, así que, segundo marca a lei nestes casos, a porca vai ser sacrificada.