Piden 2 anos de cadea para un refuxiado por agrexión sexual a unha traballadora dunha oenegué en Becerreá

O Xulgado do Penal número 1 de Lugo acolleu o xuízo a un home, natural de Malí e sen antecedentes penais, acusado de dous presuntos delitos de agresión sexual contra unha técnica dun albergue de acollida dunha oenegué coa que coincidía durante a súa estancia en Becerreá.

A vítima declarou durante a vista protexida tras un biombo e, debido ás dificultades do acusado co idioma, este prestou declaración en francés coa axuda dunha intérprete.

Segundo o escrito de acusación da Fiscalía, os feitos remóntanse ao verán de 2024, cando o acusado residía no Albergue Pensión Ancares de Becerreá baixo o amparo dunha organización non gobernamental.

Supostamente o home tocou as nádegas da traballadora

O Ministerio Público sostén que o 14 de agosto de 2024, mentres se atopaba na piscina municipal xunto á técnica de acollida e máis persoas, o home aproximouse a ela e tocoulle as nádegas por baixo da auga, sen o seu consentimento e con ánimo sexual.

A vítima explicou durante o xuízo que había máis persoas na piscina e que o contacto se produciu debaixo da auga.

Segundo o seu relato, o acusado tocoulle o cu e, cando ela apartou a súa man, el riu. "Non foi involuntario", afirmou, asegurando que posteriormente non volveron falar sobre o ocorrido.

A muller explicou ademais que no centro impartiran unha charla sobre sexualidade e repartición de preservativos. Nese contexto, segundo a súa declaración, o acusado preguntoulle como se dicían determinadas expresións relacionadas co sexo en español e manifestoulle que quería probar os preservativos con ela. A vítima sinalou que non volveu acurralala noutras ocasións, aínda que posteriormente, mentres camiñaban, volveu darlle un golpe nas nádegas, con forza.

O acusado tentou meterse no coche da muller

"Quedei en shock", relatou. Segundo o seu testemuño, despois deste episodio, o acusado tentou meterse no seu coche xunto con outro mozo.

Outra testemuña que declarou na vista tamén fixo referencia ás actividades relacionadas coa educación sexual e a repartición de preservativos. Segundo explicou, o acusado preguntaba como se dicían determinadas cuestións relacionadas co sexo en español e, nunha ocasión, non deixou saír a vítima dunha oficina.

A Fiscalía sitúa o segundo episodio o 12 de setembro de 2024, cando o acusado e a técnica atopábanse no camiño entre a Pensión Ancares e o centro de saúde de Becerreá. Segundo o escrito de acusación, o home volveu tocarlle as nádegas sen o seu consentimento e con idéntico ánimo sexual.

O home nega os feitos e di que nunca tivo intención sexual 

Durante a súa declaración, o acusado negou que existise unha intención sexual co contacto na piscina, afirmando que había moita xente no lugar e que non sabía se chegou a tocar a muller. Sobre o segundo episodio, explicou que tiña présa porque ela non se presentara pola mañá para acompañala ao médico e que a empuxou para que avanzase máis rápido.

Segundo a súa versión, pretendía empurrala polo ombro, pero "fóiselle a man".

O acusado sostivo tamén que nunca tivo intención sexual e que vía as mulleres do centro "como as súas irmás", que falaban de cuestións relacionadas co sexo porque ela era a súa profesora e que a súa intención era aprender. Segundo a súa declaración, era Marta quen lle ensinaba as distintas expresións.

A Fiscalía ve dous delitos de agresión sexual 

O Ministerio Público considera que os feitos son constitutivos de dous delitos de agresión sexual do artigo 178.1 do Código Penal e solicita para o acusado unha pena dun ano de prisión por cada un deles. Tamén reclama unha inhabilitación especial durante oito anos para calquera profesión, oficio ou actividade, remunerada ou non, que implique contacto regular e directo con menores de idade.

Ademais, a acusación solicita que se manteña unha prohibición de aproximación a menos de 500 metros da vítima, así como ao seu domicilio, centro de estudos, lugar de traballo e outros espazos frecuentados por ela, durante dous anos, e a prohibición de comunicarse con ela por calquera medio durante o mesmo período.

A Fiscalía interesa así mesmo que, unha vez cumprida a eventual pena de prisión, o acusado quede sometido durante tres anos a liberdade vixiada, coa obrigación de realizar un curso de educación sexual. O escrito de acusación reclama igualmente o pago das costas do procedemento.