O Breogán pasa por riba do Manchester Giants (105-84) e mira cara ás semifinais da BCL
O conxunto lucense dominou o encontro de principio a fin cunha gran solidez ofensiva e buscará a final da fase previa este sábado ante o Dziki Warszawa polaco
O Breogán asinou este xoves un triunfo incontestábel fronte ao Manchester Giants por 105-84 nos cuartos de final da fase de clasificación para a Basketball Champions League (BCL). Cun ritmo de xogo moi elevado e unha efectividade demoledora no ataque, os de Lugo non deron opción ao cadro británico e selaron con autoridade o seu billete para a seguinte rolda.
O equipo dirixido por Luis Casimiro puxo a directa dende os primeiros minutos, sustentado pola maxistral dirección de Dominik Mavra —autor de 27 de valoración e 13 asistencias— e a contundencia na pintura de Brankovic, que sumou 26 de valoración. A pesar dos intentos do Manchester Giants por manterse no partido grazas á aportación de Keon Thompson, a superioridade táctica e o acerto exterior dos galegos deixaron o choque visto para sentenza moito antes do bocina final.
Con este triunfo, o Río Breogán mantén vivo o seu soño europeo e cítase este sábado no duelo de semifinais contra o Dziki Warszawa, que vén de superar ao VEF Riga. O gañador desta eliminatoria dará un paso decisivo para estar na fase de grupos da BCL.
