Cantas científicas galegas coñeces?

Vai un reto en 10 segundos!

Di tres homes científicos en menos de 3 segundos. Seguramente fosen Einstein, Newton ou Flemming. 

Pero que pasa se che pido que penses en tres mulleres científicas en tres segundos. Custouche un pouco máis?

É probable. Ao longo da historia, a figura da muller foi invisibilizada e eclipsada pola do home, e a ciencia non foxe a esta realidade. Porén, que non se amose ou non se promocionen non significa en absoluto que non existan.

Non é preciso remontarse a Marie Curie ou a Rosalind Franklin. En Galicia na actualidade hai grandes científicas. Aquí che traemos algunhas co gallo do Día Internacional da Nena e a Muller na Ciencia.

1. Begoña Vila Costas, astrofísica e enxeñeira da NASA que participou no lanzamento do James Webb, o telescopio máis grande e avanzado da historia.

2. África González, Marga Poza e Susana Ladra; tres brillantes científicas que saltaron á luz polas súas achegas durante a pandemia.

3. María José Alonso, premiada nacionalmente polos seus estudos en nanomedicia.

4. Mar Capeáns, primeira física española en traballar no CERN 

5. Marisol Soengas, galardoada polas súas investigacións sobre o melanoma.

6. Minia Manteiga, primeira catedrática de Astrofísica de Galicia e colaboradora da Axencia Espacial Europea.