Anthropic, creadora de Claude, presenta a súa solicitude para saír a bolsa

A empresa estadounidense de intelixencia artificial (IA) Anthropic, creadora do chatbot Claude, presentou este luns a súa solicitude para saír á Bolsa de Nova York e cotizar no índice tecnolóxico Nasdaq.

Segundo un documento presentado ante a Comisión de Bolsa e Valores (SEC), o regulador estadounidense, a compañía avanzou no seu camiño cara ao mercado público, sen que se coñeza aínda a data oficial do seu debut bolsista.

Aínda que non se coñece cal será a oferta pública de venda definitiva (IPO, polas súas siglas en inglés), espérase que sexa unha das maiores da historia.

Segundo publica hoxe The Wall Street Journal (WSJ), Anthropic presentará documentación actualizada nunhas dúas semanas, unha vez que recolla opinións de potenciais investidores sobre a operación, e prevé saír a bolsa a semana do 16 de novembro.

Ata entón, a compañía dirixida por Dario Amodei deberá revelar a valoración á que aspira e o número de accións que ten previsto vender, engade o diario. Segundo fontes citadas polo xornal, a operación podería captar 100.000 millóns de dólares ou máis e situar a valoración de Anthropic entre 1,5 e 2 billóns de dólares.

Ata agora, a maior saída a bolsa da historia foi a de SpaceX, a compañía aeroespacial e de intelixencia artificial de Elon Musk, que recadou 75.000 millóns de dólares na súa oferta inicial de xuño, unha cifra que ascendeu a uns 86.000 millóns ao incluír a opción de compra de accións adicionais.

Goldman Sachs e Morgan Stanley figuran como os principais bancos coordinadores da saída a bolsa de Anthropic, segundo o documento presentado ante a SEC.

Anthropic, que cotizará baixo o símbolo ANT, xerou uns ingresos de 16.300 millóns de dólares no primeiro semestre do ano, fronte aos 1.200 millóns rexistrados no mesmo período de 2025, e tivo ademais unhas perdas netas de 80.700 millóns de dólares nese período, segundo o WSJ.

A saída a bolsa prodúcese en plena expansión da IA xerativa e no medio do debate sobre os riscos desta tecnoloxía, a necesidade de establecer salvagardas para o seu desenvolvemento e as dúbidas sobre a rendibilidade dos enormes investimentos que require.

O propio Amodei defendeu publicamente a necesidade de frear o desenvolvemento dos modelos de IA máis avanzados e, o pasado setembro, Jason Coxon, investigador de Anthropic especializado no adestramento de modelos de IA, dimitiu e alertou de que o rápido avance desta tecnoloxía podería acabar escapando ao control humano.