Os primeiros barcos da costeira do bonito regresan dez días antes do habitual
A lonxa de Burela acolleu esta semana a primeira poxa desta tempada
A costeira do bonito botou a andar antes do habitual e os barcos comezan a chegar a porto coas primeiras descargas. Burela, un dos principais portos de referencia desta especie, quenta o ambiente na lonxa.
O presidente dos armadores, Miguel Neira, confía en que no mes de xuño as poxas se regularicen e o movemento máis intenso se concentre en xullo e agosto.
Ata o ano pasado no porto de Burela estaban afeitos a que os primeiros bonitos chegaran a principios de xuño, pero xa o ano pasado ruláronse o 26 de maio, e este ano a poxa foi oito días antes.
O primeiro pesqueiro que volveu da costeira foi o pesqueiro Ramón Estefanía. Regresou tras 19 días no mar. Os 2.500 quilos que trouxo, vendéronse entre os 10,75 e os 14,40 euros o quilo, os máis grandes; e entre os 4,15 e os 5,80 euros o quilo, as pezas máis pequenas.
