Primeiro desembarco da costeira do bonito deste ano na Mariña
Un pesqueiro vasco descargou uns 2.000 quilos na lonxa de Burela tras un mes de marea
O Gure Fátima, con base no porto biscaíño de Bermeo, realizou a primeira descarga da costeira do bonito deste ano. Fíxoo na lonxa de Burela, onde desembarcou preto de dúas toneladas deste peixe fresco.
"Entre 1.700 e 2.000 quilos de bonito e 600 quilos de patudo, máis ou menos. Esperemos que paguen bastante, que son os primeiros frescos que entran aquí en Burela. A ver se temos un chisquiño de sorte", sinala Sergio Troya, patrón do Gure Fátima.
Para capturar o prezado príncipe azul, ademais do atún patudo, o boniteiro tivo que facer unha marea complicada. Segundo o seu patrón, chegou a desprazarse mesmo ata un cento de millas ao norte do arquipélago dos Azores.
"Foi un pouco complicada. Moitos días, con moito mal tempo. Custou moito atopar o peixe. Estivemos polos Azores, cen millas ao norte, baixamos un pouco máis para o leste, entre o paralelo 36 de latitude e os meridianos 16 ou 18 de lonxitude", afirma o patrón do barco.
Malia o seu esforzo, na lonxa burelá os primeiros lotes de bonito da tempada acadaron valores discretos, de entre 10 e 16 euros o quilo.
