O bonito do norte empeza a abundar nas peixerías e vai máis barato
Os primeiros bonitos sempre van mais caros. Esta semana foi importante a baixada de prezos nas peixerías.
Un produto moi versátil co que se poden facer moitas receitas frescas para o verán
A costeira do bonito este ano botou a andar antes do habitual. As primeiras descargas no porto de Burela foron a mediados de maio e é agora cando os prezos nas peixerías empezan a baixar.
"Toda a semana houbo un bonito moi bo, excepcional, porque baixou moito o prezo" comenta Soledad González, que ten unha peixería na praza de abastos de Lugo. Ela véndeo hoxe a 16,9 euros ao corte, pero recorda que chegou a estar a 26. A 18 véndeo Manuel Florez no seu posto do mercado de Quiroga Ballesteros, "un prezo normal".
O bonito do norte é un produto moi valorado do que destaca a súa excelente calidade.
"O bonito é un clásico neste tempo, é unha marabilla", sostén unha clienta. Outra engade: "Gústame moito, ademais así ao natural é francamente estupendo, unha comida das boas".
Tamén é moi versátil e pódose cociñar de moitas maneiras: á grella, en salpicón, en guiso... "A min gústame encebolado, está máis zumento", di unha compradora. Outra vaino cociñar con tomate, e hai quen vai utilizalo na ensalada.
Outra opción é facelo en conserva. "Dentro dunha semanas a xente xa quere preparar para enlatar". A partir de mediados de agosto chegarán exemplares máis grandes, de quince ou vinte quilos, para poñelos en conserva.
