Stellantis abre desde Vigo unha nova vía de exportación con destino Turquía

As pezas fabricadas na industria auxiliar galega con destino Turquía saen en contedores desde o peirao de Guixar, no porto vigués.

O primeiro treito faise por ferrocarril de Vigo a Alacant e alí cambia de medio de transporte, pero non de destino porque os compoñentes seguen a súa viaxe en barco ata Turquia. 

Uns 4 mil quilómetros despois, entrarán na cadea de produción da planta de Tofas, vencellada a Stellantis.

 "A nosa previsión é que Turquía se poida converter nun dos principais mercados de cooperación para mercar os nosos produtos ou tamén para intercambiar materias primas e compoñentes do vehículo eléctrico", asegura Enrique Mallón, secretario xeral da Asociación de Industriais Metalúrxicos de Galicia (Asime). 

Estas pezas non son só mercadoría que sae de Galicia, son o froito dunha especialización desenvolvida durante décadas ao redor da fábrica de Vigo e que permitiu crear unha potente industria auxiliar.

"O que se amosa con esta nova é a capacidade da nosa industria de exportar a súa fabricación e produción, especialmente no eido da automoción", explica Mallón.

Empresas que xa non producen só para Balaídos fabrican tamén para outras plantas do grupo. O corredor terá frecuencia semanal e a previsión é mover uns 8.000 contedores ao ano.

Conectan a industria galega cunha cadea de produción cada vez máis internacional porque agora xa non só exporta vehículos, tamén as súas pezas.