Buscan un motorista temerario que fuxiu dun control policial en Vilagarcía

A Policía Local de Vilagarcía trata de localizar o piloto dunha motocicleta que fuxiu logo de que os axentes intentaran darlle o alto. Circulaba coas matrículas falsificadas.

Así esquivou o motorista o dispositivo que estableceu a Policía Local para darlle o alto. Dous axentes a pé e un coche patrulla perseguían o piloto a toda velocidade pola avenida da Mariña. A manobra evasiva tivo perigo, non só para o propio motorista, senón tamén para os axentes.

"Había dous axentes alí de pé agardándoo, pero menos mal que os esquivou, porque se non podía facerlles dano, aos policías sobre todo. A manobra que fixo foi arriscada, puido caer e levaba por diante aos policías", relata unha testemuña da persecución.

"Viñan dous a pé e un coche por detrás a toda velocidade. E a moto non parou, seguiu a todo correr. Non paraba e a policía foi detrás del por toda a avenida, que é unha rúa longa. A verdade é que foi bastante espectacular, sí, parecía unha película", comenta outra testemuña, traballadora dunha cafetería situada na avenida da Mariña.

A fuga continuou polo barrio dos Duráns, ata que se lle perdeu o rastro.

"Escapou, pero a onde ía non sei, o certo é que andaron toda a tarde buscándoo, pero non o atoparon", di a primeira testemuña.

"A policía ía detrás del, tamén a moita velocidade. A verdade é que asustou moito a xente, porque ían moi rápido e foi bastante perigoso", engade a segunda testemuña.

A motocicleta tiña a matrícula manipulada, co fin de eludir os controis de tráfico. A Policía Local, en colaboración coa DXT, trata de identificar o infractor. Impútaselle un delito contra a seguridade viaria e outro de falsificación documental.

Non moi lonxe de alí, noutra intervención, desta volta no Carril, outro condutor, neste caso por descoido, meteu o coche diante da igrexa ao baixar polos tres chanzos de desnivel entre a rúa e o adro do templo. Tivo que pedir a axuda dun guindastre para poder retiralo.